இறைவா ஓ! இறைவா

வெள்ளாவி வெளியில் தவழ்ந்திடும் முன்
கரும்புகை அதனில் சூழ்ந்தனவோ..
இடியொலிக் காதினில் கேட்டிடும் முன்
மின்னொளி மண்ணைத் தாக்கியதோ..

உலகில் ஓர் ஓரறிவு

என்றாயினும் யானும் நல்லவர்களைக் கண்டுவிட
எந்நாளும் புரிகிறேன் ஒற்றைக்காலில் தவம்..
ஆயினும் எங்கும் மனிதர்களே தென்படுகின்றனர்..!

வீடு

சொந்த வீட்டில்
வாடகைக்குக் குடியமர்தல்..
மாதத்தவணைக் கடனில்
அடுக்குமாடிக் குடியிருப்பில்..!

அருள் தேவி

அடிமுடி இல்லாத நாதனிடம் - நீயும்
இடமொரு பாகமாய் நின்றாயடி..
ஆடி அடங்கிடும் வாழ்க்கைதனில் - ஒரு
பிடித்தமாய் வந்தருள் புரிவாயடி..!

இலக்கியம் பலவும் உள்ளதடி - அவை
இலக்குமி நின்புகழ் சொல்லுமடி..
கலங்கரை விளக்காய் காப்பாயடி - எந்தன் 
கலங்கிய மனத்துயர் தீர்ப்பாயடி..!

செந்தேனில் தெளிந்திடும் சுவையைப்போல - ஏகன் 
சீரோனில் ஒன்றிடக் கலந்தாயடி..
சிதறிய சிந்தையும் தெளிவடைய - உந்தன்
செந்தாள் வணங்கி நின்றேனடி..!

காப்பான் கண்ணன்

சரியெனும் தவறிலும்

சரிவில் தவறும் சரியிலும்
சர்வம் காக்க கண்ணன் வருவான்..!

வாட்டம் கூட்டி; வலிகளில் துவளும்
வாழ்க்கையின் இருள்சூழ் அறையில்
வாயிற்கதவாய் கண்ணன் காப்பான்..!

காணாதக் கானல் கண்ணீரிலும்
கண்டுவிட்ட மனதின் மென்சோகத்திலும்
எண்ணங்களின் குழப்பம் துடைக்கவே
கண்ணன் தன் வருடும் விரற்கொண்டு
உன்னை அணைக்க மலர்ந்து நிற்பான்..!

வருந்தாதே மனமே கலங்காதே..
வருவான் கண்ணன் துணையாகவே..!